வாக்குறுதிகள் வெற்று காகிதங்களா? பூர்வீக நிலத்திற்காக 24 வாரங்களாகத் தொடரும் மயிலிட்டி மக்களின் அறப்போர்!

யாழ்ப்பாணம்:
அரசியல் அதிகார மாற்றங்கள் நிகழும் போதெல்லாம் ஈழத் தமிழ் மக்களின் வாழ்வில் விடிவு பிறக்கும் என்ற நம்பிக்கைகள், மீண்டும் ஒருமுறை ஏமாற்றத்தில் முடிந்துள்ளதை யாழ்ப்பாணம் – மயிலிட்டி மக்களின் தொடர் போராட்டம் வெளிச்சம்போட்டுக் காட்டியுள்ளது. தமது சொந்தப் பூர்வீகக் காணிகளை விடுவிக்கக் கோரி மயிலிட்டி மக்கள் முன்னெடுத்து வரும் அறப்போராட்டம், இன்று (02) வெற்றிகரமாக 24 ஆவது வாரத்தை எட்டியுள்ளது.

இந்தத் தொடர் போராட்டம் வெறுமனே நிலத்திற்கான போராட்டம் மட்டுமல்ல; அது ஒரு சமூகத்தின் வாழ்வுரிமை, கலாச்சாரம் மற்றும் பொருளாதார சுதந்திரத்திற்கான போராட்டம் என்பதை இம்மக்கள் மீண்டும் ஒருமுறை நிரூபித்துள்ளனர்.

தற்போதைய புதிய அரசாங்கம் ஆட்சிப் பொறுப்பேற்றவுடன் காணி விடுவிப்பு குறித்துப் பல்வேறு சாதகமான கருத்துக்களைத் தெரிவித்திருந்தது. ஆனால், கள நிலவரம் முற்றிலும் வேறாக இருப்பதாக மயிலிட்டி மக்கள் குற்றம் சாட்டுகின்றனர்.

"கடந்த ஆட்சிக் காலங்களிலேயே இராணுவக் கட்டுப்பாட்டில் இருந்து விடுவிக்கப்பட்ட காணிகளையே, தற்போதைய அரசாங்கம் தாங்கள் புதிதாக விடுவிப்பது போலக் காட்டி ஊடகப் பரப்பெல்லைகளைத் தேடிக் கொள்கிறது. ஆனால், நடைமுறையில் புதிதாக ஒரு அங்குல நிலம்கூட இந்த அரசால் விடுவிக்கப்படவில்லை" எனப் போராட்டக் களத்தில் உள்ள மக்கள் தங்களின் ஆதங்கத்தை வெளிப்படுத்தியுள்ளனர்.

மயிலிட்டிப் பிரதேசம் என்பது விவசாயத்திற்கும், கடற்றொழிலுக்கும் பெயர்பெற்ற வளமான பூமி. பல தசாப்தங்களாகத் தங்களின் சொந்த நிலங்களை இழந்து, அகதி முகாம்களிலும் வாடகை வீடுகளிலும் முடங்கிக் கிடக்கும் இம்மக்களின் பொருளாதார முதுகெலும்பு முற்றிலும் உடைக்கப்பட்டுள்ளது. தங்களின் பாரம்பரியத் தொழில்களைச் செய்ய முடியாமல், அடுத்த தலைமுறையினரின் எதிர்காலமும் கேள்விக்குறியாக மாறியுள்ளதாக அவர்கள் கவலை தெரிவிக்கின்றனர்.

நடப்பு மாதத்திற்குள்ளாவது தமக்கான நீதியான தீர்வு கிடைக்குமா என்ற ஏக்கத்துடன் காத்திருக்கும் மயிலிட்டி மக்கள், ஏமாற்றமே மிஞ்சும் பட்சத்தில் தங்களின் போராட்ட வடிவத்தை மாற்றத் தயாராகி வருகின்றனர்.

இன்னும் ஓரிரு வாரங்களில், மயிலிட்டிப் பிரதேசத்தைச் சேர்ந்த ஒட்டுமொத்த மக்களையும், சிவில் அமைப்புகளையும் ஒன்றிணைத்து ஒரு பாரிய மக்கள் எழுச்சிப் போராட்டத்தை முன்னெடுக்கத் தற்பொழுது ஆயத்தமாகி வருகின்றனர்.

அரசாங்கங்கள் மாறினாலும், தங்களின் பூர்வீக நிலத்தை மீட்கும் வரை தங்களின் வீதிப் போராட்டம் ஓயாது என்பதில் மயிலிட்டி மக்கள் மிக உறுதியாக உள்ளனர். "எங்கள் நிலம் முழுமையாக எங்களிடம் ஒப்படைக்கப்படும் வரை, எந்தவொரு அரசியல் அழுத்தங்களுக்கும் நாங்கள் பணியப் போவதில்லை" என்பதே ஒட்டுமொத்த மயிலிட்டி மக்களின் இப்போதைய ஒற்றைக் குரலாக உள்ளது.