இலங்கையின் மீன்பிடித் தொழிற்துறையை நவீன தொழில்நுட்பத்துடன் இணைத்து டிஜிட்டல் மயமாக்கும் செயற்திட்டம் தொடர்பில், கடற்றொழில் அமைச்சு மற்றும் ஐக்கிய நாடுகளின் உணவு மற்றும் விவசாய அமைப்பு (FAO) ஆகியவற்றிற்கு இடையே நேற்று விசேட கலந்துரையாடலொன்று நடைபெற்றது.

கடற்றொழில் அமைச்சில் நடைபெற்ற இந்தக் கலந்துரையாடலில், ஐக்கிய நாடுகளின் உணவு மற்றும் விவசாய அமைப்பின் (FAO) ஆசிய மற்றும் பசுபிக் பிராந்திய அலுவலகத்தின் சிரேஷ்ட புள்ளியியல் நிபுணர் கலாநிதி சங்கீதா துபே உள்ளிட்ட குழுவினர் கலந்துகொண்டனர்.

மீன்பிடித் தொழிற்துறையை டிஜிட்டல் மயமாக்குவது தொடர்பாக FAO அமைப்பினால் இதுவரை மேற்கொள்ளப்பட்டுள்ள ஆரம்பகட்ட ஆய்வுகளின் முடிவுகள் குறித்து இங்கு விரிவாக ஆராயப்பட்டது.

குறிப்பாக, நாடு முழுவதும் பரந்துள்ள மீன்பிடித் துறைமுகங்கள் மற்றும் இலங்கை கடற்றொழில் கூட்டுத்தாபனம் ஆகியவற்றின் அடிப்படை உட்கட்டமைப்புகளை அபிவிருத்தி செய்து, அவற்றை நவீன தொழில்நுட்பத்திற்கு ஏற்ப மாற்றுவது குறித்து இதன்போது கவனம் செலுத்தப்பட்டது.

மேலும், இந்த டிஜிட்டல் மயமாக்கல் செயன்முறையின் எதிர்கால நடவடிக்கைகளை மிகவும் பயனுள்ள வகையில் திட்டமிடுவதற்கு, முன்னுரிமைத் தேவைகளை மதிப்பீடு செய்யும் முறைகள் குறித்தும் ஆலோசிக்கப்பட்டது.

டிஜிட்டல் மயமாக்கல் தொடர்பாக அமைச்சு அடையாளம் கண்டுள்ள தேவைகள் மற்றும் அதற்கு ஐக்கிய நாடுகளின் உணவு மற்றும் விவசாய அமைப்பிடமிருந்து பெறக்கூடிய தொழில்நுட்ப ஒத்துழைப்புகள் குறித்தும் இருதரப்பும் விரிவாகக் கலந்துரையாடினார்.

இலங்கை கடற்றொழில், நீரியல் மற்றும் கடல் வளங்கள் அமைச்சின் செயலாளர் கலாநிதி பி.கே.கோலித கமல் ஜினதாச, இலங்கை கடற்றொழில் துறைமுகக் கூட்டுத்தாபனத்தின் தலைவர் கபில பமுணு ஆரச்சி, இலங்கை கடற்றொழில் கூட்டுத்தாபனத்தின் தலைவர் மொஹமட் நவ்ராஸ் நஸார் மற்றும் கடற்றொழில், நீரியல் வளங்கள் திணைக்களத்தின் அதிகாரிகள் பலரும் இந்தக் கலந்துரையாடலில் பங்கேற்றனர்.

பாரம்பரிய மீன்பிடித் தொழிலுக்கு, நவீன தொழில்நுட்பத்தை வழங்குவதன் மூலம் உள்நாட்டு மீன்பிடி சமூகத்திற்கு மேலும் திறம்பட மற்றும் சிறப்பான சேவையை வழங்குவதில் கடற்றொழில் அமைச்சு தொடர்ந்து உறுதிபூண்டுள்ளதாக இதன்போது தெரிவிக்கப்பட்டது.