யாழ்ப்பாணம் (31.10.2026): "கிளீன் ஸ்ரீலங்கா" (Clean Sri Lanka) தேசிய திட்டத்தின் கீழ், “அத்தம” தேசிய தூய்மை தினத்தின் மூன்றாம் கட்ட முதன்மை நிகழ்வு யாழ்ப்பாண மாவட்டத்தில் இன்று சனிக்கிழமை காலை 8.00 மணிக்கு வெற்றிகரமாக ஆரம்பிக்கப்பட்டது.


நாடளாவிய ரீதியில் சுற்றுச்சூழலைப் பாதுகாத்து, தூய்மையான தேசத்தைக் கட்டியெழுப்பும் நோக்கில் முன்னெடுக்கப்படும் இத்திட்டத்தின் யாழ். மாவட்ட நிகழ்வுகள் யாழ்ப்பாண மாவட்டச் செயலகத்திற்கு முன்னால் உத்தியோகபூர்வமாகத் தொடங்கின.


மாவட்டச் செயலகத்தின் முன்பாக ஆரம்பமான இந்தச் சுத்தமாக்கல் மற்றும் சிரமதானப் பணியானது, கச்சேரி நல்லூர் வீதியூடாகத் தொடர்ந்து முன்னெடுக்கப்பட்டது.

 வீதியோரங்களில் தேங்கியிருந்த பிளாஸ்டிக் கழிவுகள், உக்காத குப்பைகள் அகற்றும் பணிகள் இதன்போது தீவிரமாக நடைபெற்றன.


இந்தத் தூய்மைப் பணியில் யாழ். மாவட்டச் செயலக அதிகாரிகள், உள்ளூராட்சி மன்றங்களின் ஊழியர்கள், பொலிஸார், முப்படையினர், சுற்றுச்சூழல் ஆர்வலர்கள் மற்றும் பெருந்திரளான பொதுமக்கள், சமூகத் தொண்டர்கள் எனப் பலரும் ஆர்வத்துடன் கலந்துகொண்டு வீதிகளைச் சுத்தப்படுத்தும் பணிகளில் ஈடுபட்டனர்.


இலங்கையின் தற்போதைய தேசிய மக்கள் சக்தி (NPP) அரசாங்கத்தின் வழிகாட்டலில், பொதுமக்களிடையே சுற்றுச்சூழல் விழிப்புணர்வை ஏற்படுத்தும் நோக்கில் இந்த "அத்தம" தேசிய தூய்மை தின நிகழ்வுகள் நாடு முழுவதும் பரவலாகத் தொடர்ச்சியாக நடத்தப்பட்டு வருகின்றமை குறிப்பிடத்தக்கது.