கொழும்பு: கடந்த ஜூலை 5 மற்றும் 6 ஆம் திகதிகளில் நீர்கொழும்பு சிறைச்சாலையில் இடம்பெற்ற மோதல்களின் போது, கடமையிலிருந்த வேளையில் உயிரிழந்த மற்றும் காயமடைந்த சிறைச்சாலை அதிகாரிகளின் குடும்பங்களுக்கு விசேட நட்டஈடு மற்றும் இதர உதவிகளை வழங்குவதற்கான பரிந்துரைகளுக்கு அமைச்சரவை அதிகாரப்பூர்வமாக ஒப்புதல் அளித்துள்ளது.

பாதிக்கப்பட்ட அதிகாரிகளுக்கு நட்டஈடு வழங்குவது தொடர்பாக பரிந்துரைகளை சமர்ப்பிப்பதற்காக, நீதி மற்றும் தேசிய ஒருமைப்பாட்டு அமைச்சின் செயலாளரின் தலைமையில் விசேட குழுவொன்றை நியமிக்க கடந்த ஆகஸ்ட் 3 ஆம் திகதி நடைபெற்ற அமைச்சரவைக் கூட்டத்தில் தீர்மானிக்கப்பட்டது.

இதற்கமைய, அந்தக்குழு சமர்ப்பித்த அறிக்கையின் பரிந்துரைகளை நடைமுறைப்படுத்தவே தற்போது அமைச்சரவை அனுமதி வழங்கியுள்ளது.


பொது நிர்வாக சுற்றறிக்கை இலக்கம் 22/936 இன் கீழ் வழங்கப்படும் வழக்கமான நட்டஈட்டிற்கு மேலதிகமாக, பின்வரும் விசேட கொடுப்பனவுகள் வழங்கப்படவுள்ளன:


உயிரிழந்த அதிகாரிகளின் குடும்பங்களுக்கு: தலா ரூ. 5 மில்லியன்


முழுமையாக அங்கவீனமுற்ற அதிகாரிகளுக்கு: தலா ரூ. 5 மில்லியன்


100% சம்பாத்திய திறனை இழந்து, பகுதியளவில் அங்கவீனமுற்ற அதிகாரிகளுக்கு: தலா ரூ. 4 மில்லியன்


தற்காலிக பகுதியளவு இயலாமைக்கு உள்ளாகியுள்ள அதிகாரிகளுக்கு: தலா ரூ. 3 மில்லியன்


எதிர்காலத்தில் இவ்வாறான அசம்பாவிதங்களைத் தடுக்கும் வகையிலும், சிறைச்சாலை தந்திரோபாயப் படையின் செயல்பாட்டுத் திறன் மற்றும் தயார்நிலையை வலுப்படுத்தும் நோக்கிலும் பின்வரும் அதிரடி நடவடிக்கைகளுக்கும் அமைச்சரவை ஒப்புதல் அளித்துள்ளது.

சிறைச்சாலைகள் கட்டளைச் சட்டத்தில் அவசியமான திருத்தங்களை மேற்கொண்டு, தந்திரோபாயப் படைக்கான சட்டபூர்வ அங்கீகாரத்தை வழங்குதல்.


படையை வலுப்படுத்துவதற்காக தகுதியான நபர்களைப் போதியளவில் ஆட்சேர்ப்பு செய்தல்.

தொடர்புடைய பாதுகாப்புத் துறைகளில் விசேட பயிற்சிகளை வழங்குவதுடன், தேவையான நவீன உபகரணங்களை வழங்குதல்.


சிறைச்சாலை தந்திரோபாயப் படைக்கென பிரத்தியேகமாக புதிய தலைமையகம் ஒன்றை நிறுவுதல்.இந்த நடவடிக்கைகள் அனைத்தும் பாதிக்கப்பட்ட சிறைச்சாலை அதிகாரிகளின் குடும்பங்களுக்கு வாழ்வாதார ஆதரவை வழங்குவதோடு, சிறைச்சாலைகளின் பாதுகாப்பை உச்சகட்டத்திற்கு கொண்டு செல்வதை உறுதி செய்யும் என எதிர்பார்க்கப்படுகிறது.